“A Asociación de Advogados Europeus Democratas (AED) tivo coñecimento da abertura do xuízo oral en relación ao sumário 33/01 contra as organizacións Gestoras pro Amnistía e Askatasuna, dedicadas a actividades públicas en denúncia de violacións de direitos humanos e à solidariedade con as persoas presas e con as vítimas destas violacións. Neste procedimento están imputadas 27 persoas, entre elas o advogado Julen Arzuaga, representante de Eskubideak na nosa asociación.

A AED desde hai vários anos mostrou a sua preocupación en repetidas ocasións en relación a procedimentos seguidos perante a Audiéncia Nacional, entre outros o Sumário 18/98, pola ...

aplicación dunha série de leis de excepción que vacian de contidos princípios universais do direito, garantias básicas e direitos fundamentais da persoa detida e procesada. A interpretación extensiva de tipos terroristas e a aplicación desta lexislación excepcional, deu lugar à vulneración de direitos fundamentais, do direito à defensa e do direito à presunción de inocéncia.

Neste contexto, devemos mostrar a nosa preocupación polas condicións en que se desenvolveu a instrución deste sumário. Entre outras, a entrada e rexisto de bufetes sen as garantias devidas ao segredo profisional e à confidencialidade das comunicacións con os clientes; a dilación indevida do proceso e o abuso das medidas cautelares, tais como a prisión preventiva até o máximo de catro anos e a suspensión xudicial da actividade destas asociacións.

Por todo isto, queremos facer constar que:

- Denunciamos a vulneración do direito à defensa e ao segredo profisional.
- Esiximos a derrogación de tribunais de excepción tais como a Audiéncia Nacional.
- Rexeitamos a criminalización do exercício do direito à defensa con o fin de limitá-lo.
- Rexeitamos a arbitrária e inadmisível extensión do conceito de terrorismo até atinxir actividades públicas e democráticas acollidas ao direito da liberdade de expresión e à acción política e social libre.

A AED acompañará de perto o proceso 33/01 para, no seu caso, denunciar e facer públicas as vulneracións que puderen producir-se en relación ao direito a un xuízo con todas as garantias e ao exercício ao direito à defensa.


Amsterdan, 19 de Abril 2008.