Ante a grande alarma que provoca en meios xurídicos o iminente início das vistas orais dos procesos coñecidos como 18/98 e posteriores, instruídos contra persoas e organizacións sociais e políticas vascas, un nutrido grupo de xuristas de diferentes países constituiu-se o pasado 15 de Febreiro en Comisión Internacional de Xuristas contra a Criminalización de Ideas en Euskal Herria.

O elevado número de persoas afectadas (mais duascentas cincuenta), o volume dos sumários (centenares de tomos), a gravidade das penas que se solicitan asi como os direitos, liberdades e garantias procesuais afectadas, as implicacións político-sociais dos mesmos e os preocupantes indícios de se teren vulnerado direitos fundamentais nas actuacions praticadas até o momento (direitos de asociación, de opinión e expresión, de libre designación de advogado, de inviolabilidade do domicílio, etc.etc.), están na base desa alarma a que fai referéncia o grupo de xuristas que agora se constitui en comisión para velar polo respeito dos direitos e liberdades fundamentais das persoas procesadas.

INTERNACONAL DE XURISTAS CONTRA A CRIMINALIZACIÓN DE IDEAS EN EUSKAL HERRIA

Os abaixo asinantes, xuristas que de diversos ámbitos xeográficos e de intervención traballamos na defensa dos direitos fundamentais das persoas e en defensa das garantias procesuais que deven rexer calquer proceso xudicial, tendo coñecimento dos macroprocesos xudiciais abertos no Estado español contra persoas e organizacións sociais e politicas vascas asi como das lexislacións restritivas de direitos e liberdades promovidas, constituímo-nos en Comisión Internacional con o obxectivo de superintender os procesos abertos asi como denunciar as posíveis irregularidades e violacións de direitos fundamentais que nos mesmos se deron e/ou puderen dar no futuro.

Os procesos coñecidos como 18/98 e posteriores, dadas as suas características, os suxeitos implicados, direitos, liberdades e garantias procesuais afectadas, e implicacións politico-sociais dos mesmos, produciron e continuan producindo entre nós, os asinantes, grande alarma xurídica.

Encontramo-nos perante macro-procesos de graves consecuéncias, dado o número de persoas afectadas –mais de duascentas cincuenta- polo conxunto de organizacións, colectivos ou empresas ilegalizadas, clausuradas ou suspendidas nas suas actividades ou en transe de o ser; polo volume dos sumários, con centenares de tomos, millares e millares de follas; pola gravidade das primeiras penas solicitadas e as que está previsto solicitar, etc.

Son procesos en que se avistan contidos politicos. Preocupa-nos seriamente a posibilidade de estarmos perante o que poderia ser procesos penais mediante os cais o sistema politico, o estado, trate de punir quen considere inimigos da orde constitucional vixente. Consideramos que podemos estar perante procesos penais ad hoc, xestados ex profeso con motivos estritamente de oportunidade política.

Son procesos perante os que devemos velar polo estrito respeito dos direitos fundamentais e as garantias procesuais. Neste sentido, das actuacións praticadas até o momento surxen indícios de vulneración de direitos, como os direitos de asociación, liberdade de expresión e opinión, manifestación, direito ao xuiz natural, princípio de legalidade, direito à liberdade, libre designación de advogado, inviolabilidade do domicílio, direito de defensa, igualdade de armas, etc. Indícios que é preciso analisar en mais profundidade.

A lexislación surxida no alvor destes procesos, como a nova lei de partidos políticos, e os seus efeitos supoñen a priori restricións e limitacións de direitos fundamentais que é preciso estudar con demora e, no caso, denunciá-los con total severidade.

Todo isto leva-nos a considerar a necesidade de articularmos mecanismos de seguimento, e no caso denúncia, das conculcacións dadas e que no ámbito e cadro destes procesos e lexislación puderen dar-se no futuro, polo que nos constituímos en Comisión con o obxectivo de velar polo respeito destes direitos e liberdades fundamentais.

Asi mesmo facemos un apelo expreso a todos aqueles xuristas e defensores de direitos humanos para que procedan a somar-se à presente iniciativa subscrevendo a presente declaración.

En Euskal Herria a 15 de Febreiro de 2005