Dous importantes relatórios sobre racismo acaban de ser feitos públicos: O Relatório anual de SOS Racismo, onde se documenta a situación de penúria en que son obrigadas a sobreviver no Estado Español as persoas migrantes e o incremento no número de mortes no Estreito de Xibraltar, e o Relatório do Observatório Europeu de Racismo e Xenofobia, correspondente aos anos 2001-2004. Neste extenso documento, que estuda vários aspectos da situación nos 15 estados que formavan a UE antes da última ampliación, o español aparece como un dos cinco estados (Grécia, Itália, Luxemburgo e Portugal son os outros catro) que pior información proporcionan sobre as condicións en que vive a populación emigrante.

Estes relatórios confirman os aspectos mais preocupantes da información que en Decembro do pasado ano publicara a Asociación Pro Derechos Humanos de Andalucía: Inmigración Ilegal en 2004, onde se insistia no alarmante aumento de mortes de persoas que pretendian alcanzar as costas españolas e o paradoxo de se incrementaren os orzamentos para impedir a sua chegada mais non se destinar mais recursos a tentar salvar a suas vidas.