Outro xoven vigués, E.V.D., vítima da brutal actuación policial do pasado dia 28 de Xaneiro nas imediacións do estádio de Balaídos, apresentou denúncia contra o Corpo Nacional de Polícia acompañada de parte de lesións emitido no Complexo Hospitalário Universitário de Vigo.

O mozo afirma na sua denúncia que cando se dirixia ao estádio a presenciar o xogo (Atlético de Madrid-Celta) viu pasar correndo un grupo de xente cara a entrada do fondo do estádio. Ao igual que muitas outras persoas que circulavan nese momento polo lugar, E.V.D. continuou andando con normalidade. Ao pouco, foi alcanzado por vários axentes anti-distúrbios que tamén viñan correndo e que comezaron de imediato a mallar nos viandantes que nada tiñan a ver con o altercado.

E.V.D. foi collido entre dous axentes, deitado no chao e golpeado brutalmente durante vários minutos (porrazos e pontapés) que lle provocaron lesións en brazos, xoenllos e cadeiras. Tamén recebeu golpes na cabeza e tivo que receber pontos de sutura no hospital onde foi atendido. Todo iso aconteceu apesar dos berros de muitas persoas que se encontravan no lugar e puderon presenciar a brutal malleira.

Segundo diversas fontes, o número de lesionados foi mui elevado, ainda que se descoñece se se apresentaron mais denúncias.