”O Xulgado do Contencioso Administrativo número 1 de Santiago condenou ao Concello de Compostela á retirar as cámaras de vídeo vixilancia que ten o instaladas no casco histórico da cidade. O maxistrado do xulgado avala coa súa decisión a denuncia presentada polo Movemento polos Dereitos Civís contra a entidade compostelá por mor das continuas ilegalidades cometidas a respecto do sistema de vídeo control. Segundo o establecido na sentenza, o maxistrado considera que ‘debo declarar e declaro a non conformidade a dereito do acto administrativo recorrido, condenando á Administración demandada á retirada das cámaras de vídeo vixilancia na zona vella de Santiago de Compostela’”, informa o MpDC.

O procedimento fora iniciado en 2006 a raiz de unha denúncia apresentada polo MpDC contra o Concello de Compostela por este incumprir sistematicamente os prazos designados pola lei para solicitar a renovación da autorización, carecer de libro de rexisto de imaxes e ter operativas as cámaras sen previamente instalar os devidos sinais.

Precedente na Galiza

No seu comunicado, o MpDC subliña que esta Resolución estabelece un precedente importante que deveria servir para evitar no futuro práticas abusivas na utilización do vídeo-controlo.

Práticas muitas veces respaldadas pola Delegación do Governo, que autorizou en non poucas ocasións a permanéncia de dispositivos que non contavan con as garantias xurídicas mínimas esixidas pola lei, e ignoradas por instituicións como o Valedor do Pobo apesar das reiteradas queixas transladadas polo MpDC.

Renato Núñez, portavoz da asociación, tranquiliza as persoas que confian na vídeo-vixiláncia: as cámaras instaladas no casco histórico compostelán non conseguiron evitar nengun dos atentados cometidos contra o património ou a propriedade privada nesa zona. E mais, nalgunha ocasión chegou a afirmar-se que a cámara da Praza do Toral non pudo identificar as persoas que partiron os vidros dun local comercial porque “apontavan a outro lugar”.