Apesar das obxeccións de 40 organizacións de direitos de todo o mundo, encabezadas por Article19 e o Instituto Cairota de Estudos de DD.HH, o Consello de Direitos Humanos da ONU aprovou o pasado 28 de Marzo, a proposta da Organización da Conferéncia Islámica, unha Resolución que converte en Fiscal o Relator especial sobre libre expresión.
A resolución aprovada por 32 votos e 15 abstencións, esixe que o Relator Especial de Liberdade de Expresión da ONU informe sobre abusos contra o direito à liberdade de expresión cando estes puderen constituir un acto de discriminación racial ou relixiosa.
Un dia antes, o Consello aprovara xa outra Resolución, tamén a instáncia de países islámicos, en que se mostra a preocupación pola difamación das relixións e se insta os governos a probir esa prática. Canadá e Europa votaron en contra e a Resolución foi aprovada por 21 votos a favor, 10 en contra e 14 abstencións.
O Xuiz Fernando Grande-Marlaska arquivou a querela apresentada pola Fiscalia en Outubro de 2006 contra os tres autores dun artigo e unha fotocomposición sobre o oso Mitrofan e Juan Carlos de Borbón en Outubro de 2006 acusados dun delito de inxúrias graves contra a coroa, informa Terra.
Trinta-e-umnha asociacións civis de todo o mundo, a maioria delas pertencentes a estados da Organización da Conferéncia Islámica (OCI), fixeron público un comunicado en que instan o Consello de Direitos Humanos a protexer o mandato do Relator Especial para a Promoción e Protección do Direito de Expresión e Opinión e rexeitar a amenda proposta pola OCI no decurso da 7ª sesión do Consello, informa http://www.ifex.org/en/content/view/full/92027 " target="_blank">Internacional Freedom of Expression Exchange (IFEX).
Entenden estas asociacións que a emenda proposta pretende limitar o direito a criticar ideas relixiosas e estabeleceria un perigoso antecedente ao limitar o alcance da liberdade de expresión, perfeitamente regulada nos Artigos 19 e 20 do Convénio Internacional de Direitos Civis e Políticos, onde se rexeita o incitamento ao ódio baseado en razóns de nacionalidade, raza ou relixión mais onde tamén se protexe a crítica, incluída a crítica política e dos sistemas e ideas relixiosas. “A lexislación internacional protexe a reputación de indíviduos, non de valores abstratos ou instituicións”, subliñan.
”O Movemento polos Dereitos Civís tivo acceso a información facilitada pola Garda Civil en charlas de formación interna realizados, polo menos, na provincia de PONTEVEDRA. Nestas charlas repartíronse unha serie de informacións sobre o que a Garda Civil considera “o segundo maior problema de terrorismo do España” e que se centra nas siglas MLNG (MOVEMENTO DE LIBERACIÓN NACIONAL GALEGO). Na páxina 1 das copias facilitadas aos gardas civís asistentes aparecen un autocolante coas iniciais GZ, unha bandeira galega coa estrela vermella (bandeira da patria) no centro e o escudo galego de Castelao coa frase “DENANTES MORTOS QUE ESCRAVOS” como distintivos propios do MLNG.”, informa o Movemento polos Dereitos Civis.
No documento tamén se citan persoas e grupos de “interese policial”.
O Tribunal Superior de Xustiza de Galiza admitiu a trámite o recurso apresentado polo Sindicato de Traballadoras e Traballadores do Ensino de Galiza (STEG) contra a Orde da Consellaria de Educación de Xullo de 2007 pola que se transformavan en indefinidos os contratos do profesorado de relixión e se habilitava os membros deste corpo docente para ocupar cargos directivos e desenvolver funcións próprias de funcionários (tutorias, dinamización da convivéncia escolar, bibliotecas, etc.
“A presión do STEG nesa mesa sectorial ( o único sindicato que nese momento xa expresa a súa intención de recorrela ) fai posible que se elimine o punto que permitía ocupar direccións e cargos directivos, manténdose a posibilidade da realización de outras funcións docentes.”, afirman fontes do Sindicato.
Nas dilixéncias prévias 432/2007 que se tramitan a instáncia de EsCULcA polos feitos acontecidos no mes de Xullo de 2006 no Centro Penitenciário de Teixeiro, calificado en numerosos meios como “o motin de Teixeiro”, a titular do Xulgado de Instrucción núm. 1 de Betanzos ditou auto o pasado 3 de Marzo calificando as actuacións atribuídas aos funcionários implicados como “falta de lesións” (infracción penal leve). Lembremos que a raiz dos incidentes vários presos apresentaron denúncia por tortura.
Incoerentemente, a xuíza, despois dunha investigación sumária e en base a informes médicos, estima que hai indícios da comisión de várias faltas de lesión imputáveis aos funcionários do cárcere que participaron nos feitos mais decide non levar adiante o procedimento penal polos delitos imputados na querela de EsCULcA (delitos de tortura, contra a integridade moral e por rigor desnecesário).
Decisión decerto contraditória pois se na sua breve investigación a xuíza achou indícios de vários presos teren sofrido lesións non pode calificar os feitos como infracción leve de lesións (falta) senón que, loxicamente, deverá calificar eses feitos como delito de tortura ou contra a integridade moral, por ser esta a calificación que o Código Penal reserva às agresións cometidas por funcionários carcerários no exercício dos seus cargos contra persoas que están baixo a sua custódia. Se hai indícios de lesións hai indícios de delito de tortura.
EsCULca xa formulou recurso de reforma e subsidiário de apelación contra esta incoerente resolución.
O Fiscal Xeral do Estado ordenou investigar presumíveis delitos de homicídio por imprudéncia cometidos por tres guardas civis de Ceuta que furaron os salvavidas de catro imigrantes aos que lanzaron ao mar. Un deles, senagalés de 29 anos, berrou que non sabia nadar mais os axentes botaron a rir e el acabou afogando, denuncia a CEAR (Comisión Española de Axuda ao Refuxiado).
“Cando os imigrnates chegaron à costa marroquina de Ben Youness, a guarda deste país negou-se a aceitar o que apresentava “signos claros de agonia”, polo que a Guarda Civil chamou unha ambuláncia de Ceuta, que tardou case unha hora en chegar. O home foi levado en padiola através da cancela fronteiriza, non pola fronteira oficial.”, informa La Voz de Galicia.
“O Concello de Ferrol converterá-se no primeiro valedor da Semana Santa”, afirmava La Voz de Galicia na sua edición do 13 de Febreiro.
“A administración municipal comprometeu-se a un financiamento anual de 70.000 euros fixos até o 2011 (o que supón un 45% de aumento), que será revisado e incrementado segundo o índice de prezos ao consumo (IPC) cada doce meses... e asi ficou estabelecido nas contas para o 2008 que en solitário aprovaron PSOE e IU. A cantidade con que agora contribui o Concello supón converter esta instituición no principal patrocinador económico”.
“É un grande salto cualitativo e cuantitativo”, manifestava a própria representante da Coordenadora de Confrarias de Ferrol.
A Asociación pro-Derechos Humanos de Andalucía, acaba de facer público o seu relatório anual sobre Direitos Humanos na Fronteira Sul, traballo de referéncia para muitos meios e analistas, asi como para numerosas organizacións sociais interesadas na cuestión migratória.
Elaborado con dados recollidos dos meios de comunicación, estatísticas proporcionadas polo governo, informacións fornecidas por organizacións colaboradoras de Marrocos, África e Canárias, e a própria investigación sobre o terreno da APDHA, o estudo confirma as tendéncias apontadas no Relatório de 2006 e a negativa deriva das políticas migratórias que se desenvolven no estado español.
“Dereitos Civís rexeita os argumentos expostos polo Valedor do Pobo para pechar o expediente de investigación aberto contra o Concello de Vigo pola limitación do dereito de acceso aos veciños a un pleno municipal. Segundo a resposta trasladada ao MpDC, a institución arquivou o caso ao dar por válidas as afirmacións do alcalde vigués, quen aseguraba que non existiu vulneración dos dereitos dos veciños e que os métodos empregados non foron “en ningún caso discriminatorios”. Non obstante, dende o organismo informouse aos medios que se arquivara a investigación porque había un proceso xudicial polo medio, e “neses casos non debe actuar””, denuncia o MpDC, que critica a decisión do Valedor e salienta as contradicións en que este incorre.
- « primeira
- ‹ anterior
- …
- 210
- 211
- 212
- 213
- 214
- 215
- 216
- 217
- 218
- …
- seguinte ›
- última »
